في الجزء الخامس من «أشخاص مروا من هنا يومًا»، تكتب ماجي عن أول تجربة تحرش في طفولتها، وعن الصمت ولوم الضحية وحكايات عرفتها خلال سنوات العمل التطوعي.
بقلم: ماجي
من سلسلة «أشخاص مروا من هنا يومًا»: الجزء السابق: متحرش في حياتي | الحكاية
تنبيه تحريري: يتناول هذا النص تجارب تحرش واعتداء جنسي في الطفولة، وقد تكون بعض أجزائه مؤلمة لبعض القراء.
 |
| بعض ذكريات الطفولة لا تمر بسهولة |
لكن اللي حقيقي ومش وهم إن البنات والستات في مجتمعنا وعلى مر السنين كان بيتم انتهاكهم جسديًا ومعنويًا بشكل مرعب.
أول مرة تم التحرش بيا كان عمري خمس سنين ونص، وكنت في البحر في إجازة الصيف مع أهلي.
واليوم ده مامتي كانت ملبساني مايوه بيكيني لونه أزرق، ووقعت في المياه وأنا بلعب وكنت مش عارفة أطلع.
وجه عمو ده علشان قال إيه يساعدني ويطلعني من المياه، لكنه دخل إيده جوه المايوه.
وبمشاعر الفطرة حسيت إن ده غلط، وافتكرت كلام ماما إن مينفعش حد يلمسني أبدًا.
ولما حاولت إني أزق إيده وكنت هعيط، قرصني جامد.
وأنا خوفت جدًا وقعدت أدور على ماما أو حد من أهلي، لحد ما شوفت ماما وهي بتدور عليا.
أتاريني كان البحر ساحبني بعيد عن مكان شمسيتنا بشوية.
روحت معيطة جامد وأنا بزق إيده، وطلعت أجري على ماما، اللي فضلت حضناها وأنا بترعش جامد.
وهي فاكرة إني مخضوضة علشان كنت مش شايفاها.
وفضلت قاعدة على رجل ماما اليوم ده، ما اتحركتش ولا قربت من المياه تاني.
وكانت عيني ثابتة عليه وأنا شايفاه وهو بيبص لي ومركز نظره معايا.
آلاف وملايين القصص والحكايات عن التحرش في حياة البنات من سن الطفولة ولحد ما بنعجز...
اسأل يا صديقي أي بنت عن البعبع اللي في حياتها.
عن عمو صاحب بابا اللي كانت بتتوتر في وجوده في بيتهم.
عن وجع البطن والعياط غير المبرر في كل مرة بيتقال: إحنا رايحين بيت عمو فلان.
اسأل البنات عن الخوف والرعب اللي جواهم من أقرب الناس.
الرعب من أشخاص المفروض يكونوا هم مصدر الأمان.
اسألهم عن كل عم وخال، كل أخ وأحيانًا أخت، والأكثر رعبًا عن كل أب وكمان الأم.
آه والله العظيم حتى الأب والأم كمان.
الناس دول هم المفروض مصدر الأمان لأي إنسان سواء بنت أو ولد.
لكن تخيل لما مصدر الأمان يكون هو ذاته الكابوس الحي وفيلم الرعب اللي ما بيخلصش، واللي هيستنزفهم لسنين؟!
عارفة إن الكلام بالصورة دي وعن الحاجات دي مثير للتقزز والخوف، وإنه بالنسبة لناس كتير غير مصدق ويدخل تحت طائفة الخيال المريض.
لكن للأسف أنا لازم أتكلم.
ده حقي وحق كل واحدة الخوف خلاها تسكت عن بشاعة اللي شوفناه وبنمر بيه لمجرد إننا إناث.
حادثة «متحرش طفلة المعادي» صحّت الرعب اللي جوه كل واحدة كانت ضحية لأي «عمو» في يوم من الأيام، وفكرتها كمان باللي حصل من القريب.
ده غير انتهاكها بالتحرش من الغريب، اللي بقى المجتمع للأسف الشديد في أوقات كتير بيتعامل معاه وكأنه شيء عادي، وبيغلطوا البنت لو وقفت تدافع عن نفسها وترد، وكمان بيدافعوا عن المتحرش ويقولوا طايش وغلط ومعذور!!!!
بحكم شغلي في العمل التطوعي على مدار 16 سنة، قابلت حالات إنسانية كتير لبنات وستات كانوا ضحايا للاعتداء الجنسي وهتك العرض على يد الأب أو الأخ أو العم أو الخال أو حتى الجد أو أحد ذكور العائلة محل الثقة.
الصادم إن للأسف معظم الحالات كن ضحايا للأقارب أكثر من الغرباء.
يعني مفيش أمان حتى في المكان اللي المفروض إنه مصدر الأمان.
كتير حكوا إنهم خافوا يتكلموا، واللي اتكلمت كان مصيرها الضرب والحبس والتعذيب.
منهن حالة عمرها الآن 22 سنة، ما زالت حتى لحظات كتابة هذه السطور بتتعالج بعد ما رمت نفسها من البلكونة لأن الأب كان بيتحرش بيها.
ده غير اللي حملت فعليًا من الأب أو الأخ، لكن تم إجهاضها والتعتيم كالعادة ونكفي على الخبر علشان العار والفضيحة.
والأمر مش مرتبط بالمستوى المادي أو الاجتماعي والثقافي.
ملف التحرش مليان بقصص مرعبة وبشعة.
وصدقني عدم كلامنا عنها مش بيمنع حدوثها.
ولا بنحكيها علشان نقرفك، ولا علشان عايزين «نشيع الفاحشة».
إحنا بنتكلم علشان نفضح الكائنات دي.
علشان نصرخ الصرخة اللي اتحبست في صدورنا في كل مرة كان بيتم انتهاك حرمتنا جسمانيًا ومعنويًا سواء بالكلام أو بالفعل.
بنتكلم علشان ننبه الأهالي:
خافوا أوي على بناتكم ووعوهن.
علموهن ما يسكتوش، وإن فضحهم للمتحرش مش عار ومصيبة.
اسمعوهن.
واسمعوا كمان ولادكم الصبيان، لأن هم كمان بيشوفوا من ده زي البنات.
والبيدوفيليا «اشتهاء الأطفال جنسيًا» للأسف منتشر، وأظن حادثة متحرش طفلة المعادي خير دليل، وما خفي كان أسوأ...
مفيش أي مبرر، أيًا كان هو إيه، يمنح لمعتدي أو متحرش العذر للفعل القذر اللي عمله.
حتى وإن توافر خطأ من جانب الضحية، فالخطأ ده مش مبرر أبدًا ولا عذر للمجرم.
حتى لو هي فتاة ليل بتمارس البغاء بالفلوس، فمش من حقه التحرش بيها أو الاعتداء عليها بأي شكل أو إجبارها على ممارسة الجنس بالقوة والتهديد.
خطأ الضحية من عدمه مش مبرر لهمجية وانحطاط وقذارة المتحرش.
الأمر بقى مرعب، ومحاولات التبرير وإيجاد الأعذار أشد قذارة وسفالة.
وكونه «مريض» محتاج علاج، ده ما يمنعش إنه كمان لازم يتعاقب على فداحة وبشاعة جريمته.
لكل بنت وست مرت بالتجربة المريرة البشعة دي:
أنا آسفة ليكي، ولنفسي، ولكل أنثى في مجتمعنا.
اوعي تسكتي عن حقك، والجأي لطلب المساعدة من مجموعات الدعم والمساندة اللي الحمد لله بدأت تكتر عندنا.
الكلام عن التحرش عمره ما هينتهي.
والكلام عمره ما هيوصف المشاعر المختلطة بين الخوف والقرف والقهر وامتهان الآدمية والكرامة اللي البنت بتحس بيهم في اللحظة دي.
لكن صدقني يا صديقي، الموضوع مهين ومؤلم ومرعب ومقرف أكتر مما تتخيل، وبيسيب كسر في النفسية وجرح في الروح مش بيخف ولا بيتنسى أبدًا مهما هي حاولت تتناساه...
يمكن يكون كلامي تقيل وغلس عليك.
لكن للأسف مش هعرف المرة دي أكون لطيفة معاك.
أصل الحكاية مش حلوة على الإطلاق.
إلى أول متحرش في حياتي، ولكل متحرش في حياة كل بنت:
الله يلعن أرواحكم دنيا وآخرة، يا أقذر وأنجس من مر على سطح هذا الكوكب البائس منذ عهد آدم عليه السلام وحتى قيام الأشهاد.
من سلسلة «أشخاص مروا من هنا يومًا»
- الجزء الأول: البداية | الإفراط في العطاء
- الجزء الثاني: شكرًا | التفريط وعدم التقدير
- الجزء الثالث: أبو وأم العروسة
- الجزء الرابع: متحرش في حياتي | الحكاية
- الجزء الخامس: متحرش في حياتي | أول مرة
COMMENTS