في الجزء الثالث من «أشخاص مروا من هنا يومًا»، تستعيد ماجي طايل حكاية والديها وحبهما، ووجع غيابهما، وذكريات أبو العروسة وأم العروسة.
بقلم: ماجي
من سلسلة «أشخاص مروا من هنا يومًا»: الجزء الثاني: شكرًا | التفريط وعدم التقدير
بابا وماما.. وجع القلب الذي لا ينتهي.
اسمح لي أعرّفك عليهم يا صديقي.. أب وأم.. بس كده تقدر تستخدمهم كتعريف وافي وكافي للأمومة والأبوة من نوعية الأهالي إياها.
حنية مرعبة، عطاء لا ينتهي، احتواء غير منطقي، لأن فعلًا الأبوة والأمومة غير منطقيين أصلًا، حب غير مشروط، والوحيدين اللي قابلينك زي ما أنت فعلًا حتى لو كنت شيطان رجيم.
صحيح هما طول الوقت بيوجهوك وبيحاولوا يصلحوا فيك، لكن كل ده لأنهم بيحبوك. هما الاتنين دول بس اللي حرفيًا عايزينك أحسن منهم، هما دول اللي بيشيلوا اللقمة من بقهم علشان أنت تاكل وتشبع.
حاجة كده خزعبلية نفسي أفهم عملوها إزاي..
 |
| يبقى حضورهما في كل فرحة حتى بعد الغياب. |
خبط لزق كده؟
هو كان صاحب جوز خالتي الله يرحمه، وكانوا مع بعض في الجيش في سلاح المهندسين أثناء حرب أكتوبر.
جوز خالتي كان نازل أجازة علشان يكتب كتابه، والمفروض إنه جايب لمامتي عريس كان معاهم برضه في الجيش، وعلى آخر لحظة العريس أجازته تتلغي وبابا يتوافق على الأجازة بتاعته، فجوز خالتي قال له: حلو، علشان تحضر كتب الكتاب.
وسافروا سوا..
وشافها.
أول ما شافها عينيه عملت قلوب زي توم وجيري، وراح فورًا لجوز خالتي يسأله: مين دي؟ وعندها كام سنة؟ ومرتبطة ولا لأ؟ وقال له: أنا عايز أتجوزها!!!
واللي هو كان مش عارفه إن هي كمان راحت سألت جوز خالتي عليه.
وفضل الليلة كلها متابعها.
كتب الكتاب كان في الزقازيق لأن أهل مامتي من هناك، وكانوا مفضيين بيت بالكامل من بيوت العيلة علشان العريس وأصحابه وشباب العيلة.
أبويا فضل طول الليل سهران يغني: «حبيتها.. أيوه أنا حبيتها»، وصحابه يصوتوا علشان عايزين يناموا.
ماما كانت حلوة الصراحة، والراجل معذور الحقيقة. 🙂
تاني يوم أول ما صحي نزل راح لبيت جدو وخبط، لقى ماما هي اللي بتفتح له الباب، وكانت الحقيقة بتساعد في تنضيف البيت.
قال لها: عايز أقابل عمي.
قالت له: اتفضل، بس امسح رجلك قبل ما تدخل علشان أنا لسه ماسحة.
ست مصرية زي الكتاب ما بيقول. 🙂
دخل وقابل جدي، وشرح له بمنتهى الوضوح والصراحة كل ظروفه اللي كانت ما تسمحش له إنه يقرأ فاتحة حتى، وشايل مسؤولية والدته وأخواته.
وجدي احترم فيه ده ونده على ماما يسألها.
فبابا طلب منه إنه هو اللي يتكلم معاها، وجدو وافق.
وأول ما دخلت راح قايل لها:
إيه رأيك تيجي تعيشي في الإسكندرية؟
بصت له بهدوء وقالت له:
خبط لزق كده؟
قال لها:
موافقة؟
قالت له:
آه موافقة.
وراحت قايمة خارجة من الأوضة.
وخلال 15 يوم كان خطبها وكتبوا الكتاب واتجوزوا..
سلق البيض بياخد وقت عن كده يا شباب والله. 🙂
الحب غير المنطقي
كانوا مثلي الأعلى في الحب غير المنطقي.
هي هادية وصوتها واطي وغاوية قراءة، ومتفردة في المزيكا اللي بتسمعها، ورايقة في نفسها أوي، ومفيش حاجة بتعدي من تحت إيديها إلا لو كانت لقطتها واخدت بالها منها.
وهو عصبي وصوته عالي ومتعصب كورة، وبيحب القراءة برضه بس مش بنفس الشغف بتاعها، وبيسمع المزيكا التقليدية في وقتهم، ومدخن كقاطرة بخارية على رأي د. أحمد خالد توفيق الله يرحمه.
بالنسبة ليا هما كانوا التكامل كما يجب أن يكون.
بدأ يحب نوعية الكتب اللي هي بتحبها ويقرأها، وهي اتعلمت تشجع كورة وتفكره بمواعيد الماتشات.
اتعلم إزاي ينسى إنه الباشمهندس وإنه مش بيتعامل مع مكنة، وهي اتعلمت إزاي تمتص غضبه بهدوئها وتهون عليه التوتر والقلق.
كان ما بيعرفش يقول كلام حلو، لكن كان بتصرفاته بيثبت لها كل يوم إنه بيحبها، وهي كانت بمنتهى البساطة بتقول الكلام الحلو بالنيابة عنهم هما الاتنين.
منهم اتعلمت إن الحياة الزوجية «كفاح مشترك» حرفيًا، مش خناقة وعركة مين فينا اللي كلمته هتمشي ويثبت وجوده.
اتعلمت منهم إن الاحترام والتقدير والتغافل وعدم الوقوف على كل حاجة، والطبطبة وقت الوجع، والسندة وقت الكسرة، والحضن المفتوح دايمًا حتى وقت الخصام، أهم بكتير أوي من الفرح هيتعمل فين، والشبكة هتكون بكام، وشقتي لازم تكون جنب بيت ماما.
وإن الرجولة بجد مش الشخط والنطر على أي وكل حاجة وتحكيم الرأي وتجبيس الدماغ على الفاضية والمليانة.
هي علمتني يعني إيه الست تكون «ليدي» بجد من غير ما تتنازل عن شخصيتها واحترامها لنفسها ودماغها.
وهو عرفني يعني إيه لما أختار لازم يكون «راجل بجد» مش مجرد «ذكر».
بس هما الاتنين ماتوا...
ماما ماتت الأول في فبراير 2007.
لما هي تعبت كانت قلقانة إنه يتخض في الغربة وهو لوحده، وشايلة همه رغم اللي هي فيه.
وهو لما عرف إن أمر الله نفذ كان كأنه طفل فقد أمه، وكان بيبكي بحرقة ما شوفتهاش على بابا قبل كده، حتى في وفاة جدتي وعمي الكبير.
وقعد الخمس سنين بعد وفاتها رافض يسمع من أي مخلوق كلمة «اتجوز»، وكان يقول: مستحيل حد غيرها يدخل حياتي بعدها أبدًا، لحد ما توفاه الله في نوفمبر 2012.
يا الله..
ما زال الموضوع مؤلم ببشاعة رغم مرور السنين، واللي مش قادرة أستوعب إن كل السنين دي عدت من وقت غيابهم، وكأن كل ده حصل من أيام قليلة، وما زلت غير قادرة على تجاوز لحظة وفاة كل واحد فيهم.
أبو العروسة.. وأم العروسة
فيه فيلم أمريكي اسمه Father of the Bride أو «أبو العروسة»، الفيلم إنتاج 1991 بطولة ستيف مارتن ودايان كيتون، ومن الأفلام العائلية اللطيفة جدًا.
الفيلم ده بالنسبة ليا اختراع عبقري لتوصيف مشاعر الأهل، وبالذات الأب، لما بتيجي بنته تتجوز.
صحيح إن فيه اختلافات رهيبة بين مجتمعنا والمجتمعات الغربية بصفة عامة، لكن الفيلم ده وضح قد إيه مشاعر الآباء واحدة مهما اختلف المجتمع وعاداته وقيمه.
دايمًا لما كنت بشوف الفيلم ده كنت بضحك أوي وأنا بتخيل دراما رد فعل بابا وماما يوم فرحي.
لكن لما ماما ماتت بقيت لما بشوف الفيلم ده وفيلم «أم العروسة» بتاعنا بحس إني موجوعة، لأني مش هلاقيها جنبي في اليوم ده، ومش هلاقيها تدعي لي وتطمني وتاخدني في حضنها وهي بتعيط زي الأمهات التانيين.
لكن لما بابا كمان مات، بقت الأفلام دي مجرد وسيلة تعذيب قميئة بالنسبة ليا، بعد ما كانت بتموتني من الضحك.
لأني بقيت بتوجع حقيقي، وبحس بمرار شنيع وعصرة باردة جوة قلبي إن هو كمان مش هيكون موجود جنبي في اليوم ده.
مش هلاقيه يقول للعريس زي الأفلام: خد بالك من بنتي واوعى تزعلها.
ومش هلاقيه يحضني جامد وهو بيقول لي: مبروك.
ولا هيكون هو وكيلي في العقد.
ماما الله يرحمها ما لحقتش تحضر فرح أي حد من إخواتي الثلاثة، لكن بابا الله يرحمه كان موجود.
لكن أنا الوحيدة اللي بقت مضطرة تعيش اليوم ده لوحدها بدون وجودهم هما الاتنين.
الفكرة دي بتخلي ضربات قلبي سريعة جدًا، وإيدي بتسقع، وبحس إن نفسي فعلًا بيروح.
ودايمًا بسأل نفسي...
هو إزاي فيه ناس بتزعل أهاليها وبتجرحهم، ومفيش مشكلة إنهم يقعدوا كام يوم مش بيكلموهم من باب العقاب؟
إزاي فيه ناس بتدوس على أهاليها علشان خاطر شريك حياتهم، وممكن يحطوهم في دار مسنين من غير ذرة ندم أو تأنيب ضمير؟
ده مش تنظير ولا مزايدة مني على حد، لأن كل حالة وليها وضعها وتفاصيلها وظروفها، وعارفة إن فيه أهالي صعبة جدًا وسيئة بصورة مخيفة.
لكن أنا هنا بتكلم عن أهالي عادية زي عموم الآباء والأمهات.
وفعلًا بسأل، لأن في الوقت اللي فيه عيال بتتعامل مع أهاليها أسوأ معاملة، فيه زيي كتير بيتمنوا رجوع أهاليهم ولو لحظة يوطوا فيها على رجليهم يبوسوها، ويترموا في حضنهم ويقولوا لهم:
أنتم وحشتونا أوي..
والدنيا بقت بغيابكم فاضية أوي.
والحياة صحيح مشيت، بس من حوالينا.
وإن فيه جزء مننا لسه واقف هناك عند لحظة فراقكم.
وإننا لحد اللحظة دي عايشين في وجع غيابكم.
وإن الضهر اتحنى واتقطم، والروح اتكشفت واتعرت بموتكم.
وإن مفيش ضحكة من القلب.
وإن الفرحة بعدكم بقت مبتورة ومقطوعة.
وإن في كل لحظة بتمنى حضنكم، ودعوة منكم، وشوية طبطبة.
وبدعي ربنا يهونها علشان أجتمع بيكم من تاني.
أصل الحياة بقت وحشة أوي وضلمة أوي من غيركم...
ربنا يرحم كل أب وأم ماتوا ويغفر لهم ويتجاوز عنهم ويسكنهم فسيح جناته، ويبارك في عمر اللي موجودين ويمدهم بالصحة والعافية، ويصبر قلب كل واحد فقد أهله أو عزيز عليه، وينزل السكينة على نفسه ويربط على قلوبنا يا رب.
خديجة...
كنتي نسمة جميلة أوي في وجودك ومرورك الرائع الخاطف في حياتي وحياة كل اللي عرفوكي.
وكنتي شلال حنية مغرق الكل، ولآخر لحظة كنتي قادرة إنك تضحكيني حتى وأنا هفرقع من الغيظ.
وحتى عبورك للجانب الآخر كان هادي ورقيق ومبتسم زيك.
وكل اللي عرفك مش بيفتكرك غير بضحكك اللي ما بيخلصش واحتوائك اللي مالوش حدود.
القلب اتكسر بموتك يا جيجا، والحلو طعمه غاب من الدنيا بغيابك.
حسين...
كنت صديقي المفضل اللي بحب أناكف فيه وأتجادل معاه لما أحب أعمل مثقفة وسياسية مخضرمة.
كنت مميز بحنيتك ودماغك الناشفة العنيدة وعصبيتك المحببة وضحكتك اللي بتجلجل.
وكلنا فاكرين جملتك الأثيرة:
«أمك اسمها حنفي، أو عباس».
خطفتني بموتك المفاجئ يا حاج، وهديت حيلي من بعدك.
الناس يا باشمهندس بتقول «سلام عليكم» قبل ما بتمشي.
بقول لك إيه يا صديقي...
ما تقرأ لهم الفاتحة. 🙂
من سلسلة «أشخاص مروا من هنا يومًا»
- الجزء الأول: البداية | الإفراط في العطاء
- الجزء الثاني: شكرًا | التفريط وعدم التقدير
- الجزء الثالث: أبو وأم العروسة
- الجزء الرابع: يُضاف بعد نشره.
COMMENTS