الطريق نحو عصر قوة جديد - كيف استطاع وينستون تشرشل إجبار الأمريكان على حسم الحرب العالمية الثانية؟! | بقلم (سيرجي كوربوف)

كان فيه أكتر من تفسير لتهور اليابان الشديد في ضربة بيرل هاربور، واللي اتسببت في دخول أمريكا أجواء الخرب العالمية الدايرة..

الطريق نحو عصر قوة جديد - كيف استطاع وينستون تشرشل إجبار الأمريكان على حسم الحرب العالمية الثانية؟! | بقلم (سيرجي كوربوف)

وينستون تشرشل

بدأت الحرب العالمية التانية باحتلال أدولف هتلر وجوزيف ستالين لبولندا وتقسيمها مابينهم، ودة بعد اتفاق غريب عكس المسار الأيديولوجي اللي بيمثله كل من ألمانيا النازية وروسيا البلشفية..

دقت أجراس الإنذار في أنحاء أوروبا اللي أيقن حُكامها إنهم مش هيقدروا يواجهوا جيوش الألمان وبسالتهم في تطبيق أسلوب "البليتزكريج" أو "الحرب الخاطفة"..

وينستون تشرشل رئيس الوزراء البريطاني عمل مجهود جبار لإقناع الرئيس الأمريكي فرانكلين روزفلت، عشان يشرك الجيش الأمريكي مع أوروربا في التصدي لهجمات الفيرماخت (الجيش الألماني) واجتياحه العنيف لكل أنحاء القارة.

مشكلة روزفلت الرئيسية في عدم تلبية نداء الإنجليز بسرعة، كان وعده للشعب للأمريكي بإنه مش هيشارك في حروب أوروبا، رغم قناعته الشخصية بأهمية الدور الأمريكي في حسم المعارك الدايرة في أنحاء العالم..

عشان كدة روزفلت ممنعش السفن الأمريكية (تجارية وحربية) من الحركة عبر المحيط الأطلنطي، يمكن تتهور أي غواصة تابعة لدول المحور وتضرب سفينة أمريكية، فيكون عند روزفلت مبرر المشاركة في الحرب.. لكن دة محصلش.

الضربة كانت في جزر هاواي في المحيط الهادي، لما حاملات الطائرات اليابانية تحت قيادة الفذ "إيسوروكو ياماموتو"، وضربوا الأسطول الأمريكي في بيرل هاربور، المعركة اللي صدمت الرأي العام الأمريكي من ناحية، ومن الناحية التانية جعلت للأسطول الياباني سيادة كاملة على المحيط الهادي لشهور تالية..

هنا رسميا أعلنت ألمانيا الحرب على الولايات المتحدة الأمريكية بموجب المعاهدة بين ألمانيا النازية واليابان.

روزفلت دخل الحرب بكل ثقل الأمريكان، وأعاد توجيه الاقتصاد الأمريكي للمجهود الحربي، فدارت بين أسطوله والأسطول الياباني معارك ضارية في جنبات المحيط الهادي..المعارك اللي اتحسمت تقريبا في معركة ميدواي لما الأمريكان استدرجوا اليابانيين ودمروا ال 4 حاملات طائرات بتوعهم في ضربة قاضية كان للصدفة عامل كبير فيها.

كان فيه أكتر من تفسير لتهور اليابان الشديد في ضربة بيرل هاربور، واللي اتسببت في دخول أمريكا أجواء الحرب العالمية الدايرة..

من ضمن التفسيرات دي، حصول الجيش الياباني على معلومات تفيد إن الأمريكان حركوا أسطولهم لجزر هاواي عشان بيجهزوا لتوجيه ضربة عسكرية لليابان..

الغريب بأة إن المعلومات دي تم تسريبها لليابانيين عن طريق خلية سرية تابعة للاستخبارات البريطانية.. الخلية دي تم زرعها داخل اليابان نفسها.

أيوة بالظبط... التفسير بيقول إن الداهية وينستون تشرشل وجّه اليابانيين بشكل غير مباشر لضرب الأمريكان، عشان يضطروا يدخلوا الحرب في أوروبا بكل ثقلهم..

تشرشل طلع عنده بعد نظر، والأمريكان شاركوا بجيشهم بشكل كبير في حسم الحرب، سواء في إنزال نورماندي التاريخي، أو معركة الثغرة، أو قصف دريسدن.

كل دة قبل كتابتهم لحروف كلمة النهاية فوق سماء هيروشيما وناجازاكي، بقنبلتين نوويتين بدأ بيهم عصر جديد من عصور القوة.

اقرأ أيضا

المحافظون الجدد | من هم؟ وكيف يحكمون العالم؟ | بقلم (سيرجي كوربوف)

(لا شيء بالصدفة) البجعة السوداء ومخططات اليمين المتطرف للصراعات القادمة | رؤى (مولانا العارف) بقلم (محمود فوزي)

الدم يقابله الدم.. الموت يقابله الموت | كيف كانت ستالينجراد نقطة تحول في مسار الحرب العالمية الثانية ؟

السيطرة على العالم | تاريخ الذهب والنقود ومشوارهما الطويل لاستعباد البشرية