العمل على تطوير اللقاح ضد فيروس كورونا تقريبا بدأ من يناير اللي فات، وفيه شركات روسية وصينية وإسبانية وأمريكية وألمانية، وغيرهم كتير شغالين على اللقاح

كيف يعمل لقاح كورونا؟ | شرح مُبَسَّط بقلم (د. إيهاب البلشي)

لقاح فيروس كورونا المُنتظر

هنحاول نفهم مع بعض؛ إيه هو لقاح كورونا؟!
في البداية؛ هذا الفيروس ينتشر بشراسة شديدة، والأمل الوحيد الآن - بعد لطف الله عز وجل - هو تطوير لقاح أو تطعيم ضد هذا الفيروس..

 

طيب؛ نبدأ من الأول..

ما هو اللقاح أو التطعيم؟!

مبدأ اللقاح أو التطعيم؛ هو ببساطة خَلْق عملية محاكاة أو تمثيل لحدوث عَدْوى بميكروب ما ( فيروس أو بكتيريا أو طفيلي)، فيتم فيها خداع الجسم البشري وجهازه المناعي لإنتاج أجسام مُضَادة، أو تحفيز خلايا المناعة ضد هذا الميكروب..

ببساطة؛ اللقاح هو عملية تعريف للجسم البشري على الميكروب.

 

طيب؛

إحنا هنعرَّف الجسم على الفيروس إزاى، من غير ما يجيله كورونا؟!

بسيطة..

إحنا نجيب الفيروس ونموِّته، أو نجيب الفيروس ونضعفه (نخليه ضعيف)، وبعدين نحقنه في جسم الإنسان.. أو إحنا مناخدش الفيروس كله، وناخد جزء منه بس؛ إما جزء من الغلاف البروتيني بتاعه، وإما جزء من حمضه النووي(المادة الوراثية) اللي اسمه RNA..

طيب؛ لما المبدأ سهل كدة، يبقى فين المشكلة؟!
الحقيقة؛ هي مش مشكلة واحدة.. هم عدة مشاكل..

المشكلة الأولى

إننا منعرفش بالتحديد رد فعل الجسم البشري لما نحقنه بفيروس ميت أو ضعيف أو جزء من الفيروس.. ممكن الجسم يمرض أو نسببله أذى دائم.

المشكلة الثانية

إننا مش عارفين على وجه التحديد ماهية الأجسام المضادة اللي هتتكون، وهل هي فعَّالة فعلا في كبْح الفيروس؟! ولو هي فعالة؛ ما هي مدة بقائها في الجسم قبل ما الجسم يكسرها؟!

المشكلة الثالثة

إن الفيروسات عموما لها قدرة عالية على التحور وتغيير شكلها؛ وإن كان الموضوع دة لم يثبُت بصورة مؤكدة بالنسبة لفيروس كوفيد ١٩ حتى الآن.

المشكلة الرابعة

هي مشكلة تقنية.. يعني إزاي هنحافظ على الفاكسين أو اللقاح دة ثابت، ويتحمل عمليات التعبئة والنقل..

 

طيب؛ هم دلوقتي وصلوا لإيه؟!

العمل على تطوير اللقاح ضد فيروس كورونا تقريبا بدأ من يناير اللي فات، وفيه شركات روسية وصينية وإسبانية وأمريكية وألمانية، وغيرهم كتير شغالين على اللقاح.
الفرق بيكون في مراحل تصنيع اللقاح؛ فالشركات الأمريكية والأوروبية لازم تتّبع إجراءات مُعقَّدة لتجربة اللقاح وضمان أمانه التام، والشركات الروسية والصينية متساهلة شوية في الموضوع دة..

آخر لقاح وأقربهم للتطبيق هو اللقاح اللي بتنتجه شركة ألمانية بالتعاون مع شركة فايزر الأمريكية؛ وفكرته إنهم أخدوا جزء من المادة الوراثية (RNA) المسؤولة عن تكوين أشواك الفيروس المشهورة، وبيخلوا الجسم ينتجها، وبالتالي جهاز المناعة هيكوِّن أجسام مضادة ضد هذه الأشواك الموجودة في الفيروس الحقيقى، فيمنعه من الالتصاق بالخلية البشرية زي ما هو موضح بالصورة.

التصاق الفيروس بالخلية البشرية

اقرأ أيضا: أساسيات واجب توافرها عند الحجر المنزلي (بقلم: علي صلاح)